E dokter di cas tin un entrenamento amplio y tin e rol di portero (“gatekeeper”) den e sistema di cuido. Esaki ta significa cu e dokter di cas, como parti di e cuido primario, ta trata un gran porcentahe di e kehonan relata na salud y enfermedadnan. Esaki ta reduci e peso pa e cuido secundario cu ta mas costoso.

E cuido di un dokter di cas ta ofrece un pakete amplio di intervencion diagnostico, terapeutico y orienta riba prevencion. E dokter di cas tambe ta guia hende con pa anda cu nan enfermedad.

E cuido optimal pa e pashent ta rekeri naturalmente comunicacion efectivo unda lo ke e pashent mester ta sincronisa cu lo ke e dokter di cas por ofrece. Pa es motibo ta pone atencion pa cu keho, malesa, diagnostico, tratamento, pero tambe pa cu pregunta, deseo, posibilidad y preferencia di e pashent.

Si e pashent tin sintoma di Covid-19, e mester comunica inmediatamente cu e dokter di cas. A base di e protocol vigente (di test), e dokter di cas lo dicidi na e momento ei y den bon comunicacion cu e pashent kiko ta e proximo stapnan.

Si e pashent bira malo diripiente y e no tin sintoma asocia na Covid-19, e pashent mester yama e dokter di cas cu lo evalua si ta necesario pa hasi un afspraak pa mas test y/of tratamento. Si e pashent malo tin un afspraak plania na consultorio di dokter, e mester contact su dokter cu lo dicidi si un afspraak lo por of no.  

E consultorionan di dokter di cas ta uza un mescla di tipo di consulta pa por ofrece cuido optimal. E desaroyonan relaciona cu e pandemia di e corona virus tin influencia riba con e consultanan ta wordo organisa. Tur consultorio di dokter di cas ta responsabel pa informa e pashent mas lihe posibel sobre cualkier cambio riba e tereno aki. Posibel opcionnan di consulta ta: afspraak na consultorio di dokter, consulta via telefon, bishita di dokter y yamada via video.  

Triage ta e proceso cu ta wordo uza na consultorionan di dokter di cas pa separa e fluho di pashent. E assistent ta yuda e dokter di cas den e proceso aki y e ta competente pa hasi triage. E assistent tambe ta ofrece apoyo importante den consultorio di dokter pa protege e privacidad di informacion di pashent.

Separa e fluho di pashent ta posibel door di haci preguntanan importante pa determina e nivel di urgencia y e tratamento adecua. E assistent ta hasi esaki a base di bon triage via telefon. E ta determina e escogencia di e tipo di contacto (fisico, via telefon, yamada via video) y den tempo di Covid-19 e obhetivo final ta pa preveni e transmision di e virus den consultorio di dokter di cas. Esaki ta sosode den consulta estrecha cu e dokter di cas y/of a base di su instruccionnan.

Bai abou riba e pagina aki y click riba e video “Triage HAVA video”, den cual algun dokter di cas di HAVA ta splica e proceso di triage den mas detaye. Video ta na Papiamento.

Un bon accesibilidad ta significa cu por contact facilmente via telefon y den dia cu e consultorio di dokter di cas durante oranan di oficina. Esaki ta significa cu e persona cu ta yama ta haya den par di minuut na linea un assistent cu ta contesta of un machine automatico cu ta duna informacion (tocante horario).

Tuma nota: cada consultorio di dokter di cas tin nan propio accesibilidad via telefon, por ehempel na un consultorio, e assistent ta contesta telefon entre 8.00-10.00 am y 1.00-3.00 pm y na un otro esaki ta entre 8.30-10.00 am y 1.30-4.00 pm.

Cada consultorio tambe tin un linea di emergencia, cu por supuesto tin cu wordo uza solamente pa emergencia. Pafor di e horario di oficina, incluyendo fin di siman, semper tin un dokter na warda.

Relaciona cu e pandemia di coronavirus, medidanan adicional ta na vigor na consultorio di dokternan di cas. Pashentnan solamente mag di bishita consultorio si nan no tin sintoma di Covid.

Algun consultorio tin un maneho di porta cu ta encera cu solamente hende cu cita mag di drenta consultorio di dokter. Buska carta, receta, etc. ta wordo regla mas hopi posibel electronico. E number di pashent cu por ta den e sala di espera ta limita y, si ta necesario, e assistent ta pidi e pashent pa warda pafor of den auto.

Ora organisa e sala di espera, ta tene cuenta cu e 1.5 meter di distancia social y e consultorio ta hasi su esfuerso pa tin un tempo di espera mas cortico posibel. Ta obligatorio pa uza un face mask den consultorio. 

E dokternan di cas di HAVA ta traha conforme e indicacionnan di RIVM (Instituto Nacional Hulandes di Salud Publico y Medio Ambiente) y NHG (Asociacion Hulandes di Dokternan di Cas) encuanto e uzo di material di proteccion personal (EPP) den nan consultorionan. Como medida preventivo, e EPP ta wordo uza den tur momento di contacto cu e pashent. E pashentnan mester uza tapaboca na tur momento den un consultorio.

Den mayoria di caso, e personal di un consultorio ta consisti di (un) dokter(nan) di cas, assistent(nan) y enfermero(nan). Pa esey, contacto cu e consultorio por ta cu 1 di e miembronan di personal.

E dokter di cas ta esun cu principalmente ta wak y examina e pashent. E dokter di cas por delega cierto tarea na e enfermero di e consultorio (POH) of e assistant, pero e ta carga e responsabilidad final encuanto e cuido di e pashent. E tareanan di un POH por ta diferente den cada consultorio.

E posibel tareanan di un POH ta guia profesional di pashentnan cu tin un condicion fisico cronico, manera diabetes mellitus, asma/COPD y malesanan cardiovascular. E guia y tratamento di pashentnan cu problema psicologico, psicosocial o psicosomatico tambe por ta tareanan di e POH.