FAQs PAP – Informacion – dokternan di cas na Aruba

Con mi por registra pa dokter di cas?

Por pasa pa inscribi na consultorio di dokter cu ta tuma pashent nobo. Pa sa cua consultorio ta hasi esaki, por check e informacion aki riba website di AZV, https://www.azv.aw/pa/instancianan-medico/docter-di-cas/.

Please check ki ora e consultorio ta habri. Informacion di horario por haya riba website di HAVA, https://www.havaruba.org/pa/contacto-horario/. Y no lubida di hiba bo carchi di AZV of bo AZV App den bo telefon pa bo por inscribi.

Con mi por scoge un dokter di cas?

In principio, bo por inscribi na un consultorio di dokter cu ta tuma pashent nobo.

Den cierto casonan, dokter di cas por hasi un excepcion, por ehempel ora dokter kier tin miembro(nan) di famia hunto den un consultorio en conexion cu malesanan genetico y e miembro(nan) ta ok cu esaki.

Con largo un consulta cu dokter di cas ta dura?

Un consulta cu dokter di cas ta dura ongeveer 10 minuut.

Si ta desea un cita mas largo cu dokter, por consulta cu e assistent pa e por tene cuenta cu esaki ora di traha un cita pa bo.

Si mi ta un menor di edad, mi mag di bishita mi dokter sin mi mayor?

Sigur, esei ta posibel.

Please tene na cuenta, cu te na e edad di 18 aña, bo mayor tin derecho pa pidi dokter di cas bo informacion medico cu tin registra den bo file.

Si bo ta bou edad di 12 aña bo dokter di cas ta obliga di comparti esaki cu bo mayor. Si bo ta entre 12-18 bo dokter di cas mester bo permiso tambe pa comparti esaki.

Kico ta triage?

Triage ta e proceso cu ta tuma lugar na momento cu bo yama of bai un facilidad medico. E sistema di traha manera antes, unda ta bai para den rij pa coi number a pasa pa algo di pasado. Awendia cu e sistema di triage, nos ta inventarisa e necesidad di e pashent for di comienso pa por yude di e miho manera.

Dicon triage?

E objetivo di e preguntanan cu ta hasi durante e triage ta pa determina con ta bai plania e agenda di e praktijk pa henter e dia. Pesey ta sumamente importante pa duna e assistent informacion mas completo posibel y di un manera concreto. Esaki ta determina tambe e urgencia di e caso.

Mayoria di e assistentnan ta opgeleid y getraind pa hasi e preguntanan aki. Manera e dokter di cas, e assistent tambe tin obligacion di confidencialidad medico.

Kico ta importante ora yama praktijk?

Ta importante pa e pashent mes por yama praktijk di dokter di cas. Tin casonan cu esaki no por, por ehempel si ta trata di un mucha of un anciano cu no por papia of un hende cu ta hopi enfermo.

Ta importante tambe pa sa exactamente e detayenan di e keho di salud of enfermedad, por ehempel cuanto tempo y unda tin dolor, con frequente e ta, kiko ta alivie, kiko ta hacie pio, con hopi e ta dura.

Dosis y nombernan di remedi tambe ta importante pa dokter sa. Pasobra asina nos por hasi un miho decision ki remedi por duna of ki remedi no mag di duna.

Kico ta pasa despues di e proceso di tirage si ta trata di un emergencia?

Si ta trata di un caso di emergencia, e assistent ta activa e protocol di emergencia. Esey kiermen, e agenda di dokter ta wordo interumpi y si mester hunto cu personal di emergencia ta atende cu e caso di e pashent. Por ehempel, den caso di un atake di curason of un stroke, si bo ta den un situacion asina, yama direct cu e number di emergencia di bo dokter.

Pesey ta importante pa no mal usa e number di emergencia pa pidi pa cosnan regular manera un consulta of herhaalrecept. Na e momento ei, bo por stroba un persona cu ta den un situacion critico pa comunica cu dokter.

Tur number di emergencia di tur dokter di cas ta activo di dialuna pa diabierna di 7.00 am – 6:00 pm. E informacion aki ta disponibel riba HAVA su website; https://www.havaruba.org/pa/informacion-dokter-di-cas/. Despues di e oranan aki por acudi na dokter na warda of spoedeisende hulp na hospital of imsan.

Kico ta pasa despues di e proceso di triage si ta trata di casonan no urgente?

Pa casonan no urgente, tin varios opcion.

E assistent por spreek af un cita personal cu e dokter di cas of un cita via telefon. Tambe por planea un bishita di dokter na cas di e pashent si no tin posibilidad pa yega praktijk, por ehempel si e patient no por cana of ta hopi malo. E assistent por tuma bo pregunta, ta overleg esaki cu e dokter di cas y ta yamabo bek cu e contesta. Of e assistent mes por duna conseho y ta informa dokter kiko e la conseha bo.

Ora bo ta haya un ora pa bo bin pa un cita personal serca dokter, mantene bo na e ora cu bo a haya. Esaki ta pa evita aglomeracion na oficina. Asina ta cu cada biaha bo acudi na bo dokter di cas, bo ta wordo yuda door di un team cu ta traha hunto na bo salubridad.

Kico ta HAP?

HAP ta nifica huisartsenpost. Esaki ta un post (lugar) unda cu bo lo por bin den caso di emergencia pa comunica cu un dokter na warda. HAP a wordo crea pa asisti e pashentenan cu no por warda pa e siguiente dia pa bin dokter di cas.

HAP ta accesibel via di e entrada di Spoedeisende hulp na Dr. Horacio Oduber Hospital. Den siman HAP ta habri entre 18.00-22.00 y den weekend di 9.00-13.00 y 18.00-22.00.

Na ki momento mester bai HAP?

HAP ta wordo uza pa casonan di emergencia. Por ehempel, ora muchanan tin keintura halto of ora bo mesun curpa bira hopi malo.

Importante: HAP no ta un lugar pa bin si bo persona no tabata tin e tempo pa bishita bo dokter di cas durante dia. Ora cu e kehonan no ta un caso di emergencia, bo persona por wordo pidi pa bishita bo mesun dokter di cas e siguente dia.

Kico tur ta posibel na HAP?

HAP ta un huisartsenpost. Kinan bo lo por discuti bo keho cu un dokter di cas den caso di emergencia. E dokter di cas lo por controla y haci un checkup. Si ta necesario, remedi por wordo receta na e pashent.

Na HAP no ta posibel pa saca sanger, haci un echo of un CT-scan, of wordo manda pa un oficina di specialista.

Solamente si riba e mesun dia bo mester mas onderzoek, e dokter lo verwijs bo pa Spoedeisende Hulp (SEH). Si esaki no ta necesario, bo lo wordo avisa pa contact bo mesun dokter di cas durante su orarionan di oficina pa e por haci mas onderzoek.

Con pa meld mi mes na HAP?

Pa wordo asisti na HAP, bo mester meld bo mes na e balie di Spoedeisende Hulp na Dr. Horacio Oduber Hospital. No por meld via telefon. Ora meld, bo lo wordo asisti door di un enfermero/-a cu lo sigui e procedura di triage; e lo hasi bo algun pregunta pa asina determina e urgencia di e caso. Ora determina e urgencia, bo lo wordo pidi pa sinta den e wachtkamer. Bo lo wordo atendi, manera cu bo ta na beurt.

Den cierto caso, manera ora bo kehonan no ta un caso di emergencia, bo persona por wordo pidi pa bishita bo mesun dokter di cas e siguente dia. E servicio di HAP a wordo crea pa casonan urgente cu no por warda te e siguiente dia.

Kende ta e team na consultorio di dokter?

Na un consultorio di dokter di cas, e dokter ta traha den un team pa por brinda e cuido y servicio cu un pashent mester. E team ta consisti semper di un dokter y un of mas assistent. Desde 10 aña, e dokter tin e oportunidad di haci uzo di e servicio di un POH (un praktijkondersteuner Huisarts) y p’esey na cierto consultorionan e servicio di POH tambe ta wordo brinda.

Kico dokter su rol ta den e team?

Dokter ta e specialista medico cu ta carga e responsabilidad final pa e cuido cu ta wordo brinda y remedi cu ta wordo receta na e pashent. Tur decision riba tereno di medicina cu ta wordo tuma pa e pashent su salud ta cay bou di su responsabilidad.

P’esey como esun cu ta carga e responsabilidad aki, tur ayudo cu e dokter ta ricibi di su coleganan pa e pashent ta sosode bou di su supervision.

E dokter tambe ta e punto di contacto pa specialistanan di cuido na hospital/IMSAN of otro dunado di cuido ora ta trata e maneho di cuido di e pashent.

Kico ta e trabou di un assistent?

E assistent ta e prome punto di contacto pa e pashent ora yama of bishita e consultorio. E assistentnan ta educa/instrui pa por brinda e servicio inicial. Pa por determina e urgencia di e pashent, e assistent semper ta haci par di pregunta pa por evalua e caso y organisa e agenda di nos consultorio mas miho posibel (e proceso di triage).

Ta importante pa sa cu den cierto casonan, un assistent mes por conseha e pashent kico por haci miho den su caso. Den un situacion asina, e assistent semper lo informa e dokter di cas kico el a conseha.

Un assistent tambe ta dedica su mes na e administracion di e consultorio, atrobe bou di e supervision di e dokter di cas. Den algun caso, dokter por tin banda di e assistent, tambe un assistent administrativo cu ta traha unicamente den administracion.

Kico ta e trabou di un POH?

Dokter di cas tambe por delega cierto tareanan na un POH si tin uno den e team. Si tin un POH, su tareanan por ta diferente den cada consultorio. Pero e esencia di su trabou ta den e guia profesional cu e ta duna e pashent.

E tareanan di un POH na Aruba ta guia pashent cu tin un condicion fisico cronico, manera diabetes mellitus, asma/COPD y/of malesanan cardiovascular.

Pero den exterior, e guia di pashentnan cu problema psicologico, psicosocial o psicosomatico tambe por ta tareanan di e POH. Nos ta spera di por tin POH den e ramo aki tambe na Aruba den futuro.

Na Aruba e servicio di un POH ta wordo ofreci pa mas cu 10 aña y e profesionalnan aki ta cay bou di e organisacion di Wit Gele Kruis.